ლუკა ლოჩოშვილი ტრანსფერთან ახლოსაა - სად ითამაშებს ქართველი

წლევანდელი სეზონის სატრანსფერო ფანჯარა ქართველი სპორტსმენებისთვის საკმაოდ საინტერესო შეიძლება იყოს. გუნდის შეცვლასთან ყველაზე ახლოს ლუკა ლოჩოშვილია. „კრემონეზეს“ ფეხბურთელის შეძენით თურქული კლუბების წარმომადგენლები სერიოზულად არიან დაინტერესებული.

კონკრეტულად, ქართველი ლეგიონერის ტრანსფერზე „გაზიანთეფი“ და „რიზერსპორი“ მუშაობენ. მათი მხრიდან გამოჩენილი ინტერესის განსახილველად ლოჩოშვილის აგენტი იტალიაში იმყოფება. იგი „კრემონეზეს“ წარმომადგენლებს სატრანსფერო შეთავაზებების განსახილველად უკვე შეხვდა. უახლესი ინფორმაციის თანახმად, თურქეთის სუპერ ლიგაში გადაბარგების სანაცვლოდ, ქართველ ფეხბურთელს საკმაოდ სოლიდურ ხელფასს სთავაზობენ, ხოლო სატრანსფერო თანხის რაოდენობა დაახლოებით 2 მილიონი ევრო იქნება.

უკვე ცნობილია, რომ ლოჩოშვილს ამჟამინდელი კლუბის დატოვება თვითონაც სურს. ამასთანავე, იტალიური კლუბის წარმომადგენლები აღნიშნული ტრანსფერისთვის ხელის შეშლას არ აპირებენ.