უეფამ დინამო თბილისი 80 ათასი ევროთი დააჯარიმა - არსებობს ევროტურნირებზე მონაწილეობის აკრძალვის რისკიც

UEFA-მ ევროპულ კლუბებს სანქციები დააკისრა. რამდენიმე მათგანს ევროპული ტურნირებიდან მოკვეთის საფრთხეც ემუქრებათ, სიტუაციის გამოსწორებაზე თუ არ იზრუნებენ. საუბარია სახელფასო დავალიანების გადაუხდელობაზე და მსგავს დარღვევებზე.

ხელფასების ანაზღაურების უზრუნველყოფა „დინამომ“ საფუძვლიანად ვერ შეძლო, რის გამოც უეფამ ქართულ კლუბს 80 ათასი ევროს ოდენობის ჯარიმა დააკისრა. თუკი „დინამო თბილისი“ სიტუაციას არ გამოასწორებს, კლუბს ბევრად უფრო სერიოზული სანქციები დაეკისრება.

უეფას მიერ დაჯარიმებული კლუბების სიაში მოხვდნენ ისეთი გუნდებიც, როგორიცაა „პორტო“, „გალათასარაი“ და „ბეტისი“. ჯამში ევროპული ფეხბურთის მმართველმა ორგანომ 13 კლუბი დააჯარიმა.

„ცსკა სოფია“ და „გიმარაეში“ ევროტურნირებიდან მოიკვეთებიან, თუკი აღნიშნულ პრობლემებს მომავალი 2 სეზონის გასვლამდე არ აღმოფხვრიან. ევროტურნირებზე მონაწილეობის უფლება უკვე შეეზღუდათ „სოლიგორსკის შახტიორს“ და „ადანა დემირსპორს“. დისკვალიფიკაციის სანქცია მომავალი სეზონიდან ამოქმედდება. თუკი 13 გუნდიან სიაში მოხვედრილი სხვა კლუბები სიტუაციას არ გამოასწორებენ, ევროტურნირებზე მონაწილეობის საშუალება მათაც შეეზღუდებათ.