საოცარი სიტყვებია, გაოცდა - რა თქვა ლიეტუვის ჟალგირისის მწვრთნელმა თორნიკე კვარაცხელიაზე

ვილნიუსის „ჟალგირისის“ მთავარმა მწვრთნელმა ანდრიუს სკერლამ კონფერენს ლიგაზე „დინამო თბილისთან“ მარცხის (0:3) შემდეგ ისაუბრა.

მან თქვა, რომ მეტოქემ უკეთ ითამაშა, მაგრამ გოლები მაინც თავისი გუნდის შეცდომებს მიაწერა. ასევე შეაქო თორნიკე კვარაცხელია და აღნიშნა, რომ საქართველოში კიდევ ერთი ვარსკვლავი იზრდება.

„იყო მომენტები, როდესაც ბურთს ვაკონტროლებდით, ბურთის კონტროლი დაახლოებით თანაბარი იყო. თუმცა, განსაკუთრებით პირველ ტაიმში, როდესაც ბურთს ვაკონტროლებდით, ძალიან ადვილად ვკარგავდით მას, შემდეგ კი მეტოქისგან კონტრშეტევებს ვიღებდით. ინდივიდუალურად მათ დიდი პრობლემები შეგვიქმნეს.

მათ კარგი მომენტები ჰქონდათ, გვაჯობეს, მაგრამ ეს შესაძლებლობები ვერ გამოიყენეს. ჩვენ მიერ გაშვებული გოლები კი ძალიან უხეში შეცდომების შედეგი იყო. ამ ეპიზოდებში ნამდვილად შეგვეძლო უკეთ გვეთამაშა და მაშინ შედეგი სხვა იქნებოდა.

სტანდარტულებიდან გოლების გაშვება? ახლა ადვილია იმის თქმა, იყო თუ არა ეს კონცენტრაციის ნაკლებობა. მეკარე სეივს აკეთებს, მაგრამ ისევ ვუშვებთ შეცდომას, არ ვართ ახლოს მეტოქესთან და ისინი გოლს იტანენ. სამწუხაროა, რადგან ეს კონტროლირებადი სიტუაციებია. ასეთი გოლების გაშვება განსაკუთრებით იმედგაცრუებას იწვევს.

მოწინააღმდეგემ ინდივიდუალური თამაშით სახიფათო მომენტები შექმნა და ერთი-ერთზე თამაშით გვაჯობა. ჩვენმა მეკარემ დღეს ნამდვილად კარგად ითამაშა და გადაგვარჩინა. თუმცა, გოლები ჩვენი შეცდომების შემდეგ გავიდა. მეორე ტაიმში 0:3-ით დაწყება ადვილი არ იყო. შესაძლოა, მეტოქე ცოტა დამშვიდდა. ბურთს ვაკონტროლებდით, მაგრამ მათთან თამაში გაგვიჭირდა, თუმცა რამდენიმე სახიფათო მომენტი შევქმენით.

თორნიკე კვარაცხელია? ვიცოდით მის შესახებ, ვნახეთ ვიდეოები და მისი ყველაზე ძლიერი თვისებები. თუმცა, მაინც ძალიან გასაკვირია, რომ 16 წლის ფეხბურთელი ფიზიკურად ასეთ კარგ ფორმაშია და ასეთი ნიჭიერია. ვფიქრობ, აქ კიდევ ერთი ვარსკვლავი იზრდება. როდესაც მას ბურთი აქვს, არ ეშინია, თამამად თამაშობს, მეტოქეს ატყუებს, ცდილობს, ეს გააკეთოს, ზოგჯერ ბურთს კარგავს, მაგრამ არ ეშინია.

საპასუხო შეხვედრაში ხასიათი უნდა გამოვავლინოთ. ის, რაც პირველ ტაიმში მოხდა, არავისთვის იყო კარგი - არც ჩვენთვის და არც გულშემატკივრებისთვის. ვიცით, რომ სტადიონი სახლში სავსე იქნება, ხალხი ჩვენს მხარდასაჭერად მოვა. ამ თამაშის მოგება გვინდა“, - თქვა სკერლამ.

შეგახსენებთ, რომ „ჟალგირისისა“ და „დინამოს“ საპასუხო მატჩი ვილნიუსში, 30 ივლისს გაიმართება.