ჭიდაობის მსოფლიო ჩემპიონატზე ოქროსთვის 2 ქართველი იბრძოლებს

ალბანეთის დედაქალაქ ტირანაში თავისუფალი ჭიდაობის მსოფლიო ჩემპიონატი მიმდინარეობს. მის ფარგლებში ჯამში ოთხ არაოლიმპიურ წონით კატეგორიაში გაიმართება შეხვედრები. ტურნირი საკმაოდ წარმატებით დაიწყო ქართველი მებრძოლებისთვისაც. ავთანდილ კენჭაძემ (79კგ) და მირიან მაისურაძემ (92კგ) უკვე მოიპოვეს ფინალში ასპარეზობის უფლება. 

კენჭაძემ პირველი წრის შეხვედრაში თურქი იბრაჰიმ იაპრაკი დაამარცხა, შემდეგ ეტაპზე კი იაპონელ კოტა ტაკაჰაშის სძლია. ამის შემდეგ მან მეოთხედფინალისტი ყაზახი დაულეტ ერგეში დაამარცხა, ხოლო ნახევარფინალში ირანელი მოჰამად ნოხოდილარიმის წინააღმდეგ გამართული რთული ბრძოლის მოგებით მოიპოვა ფინალის საგზური. ოქროს მედლის მოსაპოვებლად იგი ნეიტრალური სტატუსით მოასპარეზე მაგომედ მაგომაევს დაუპირისპირდება.

მირიან მაისურაძის გზა ფინალისკენ ინდოელი სანდიპ მანის დამარცხებით დაიწყო. მან შემდეგ ეტაპზე სლოვაკეთის სახელით მოასპარეზე ბატირბეკ ცაკულოვს სძლია, ხოლო ნახევარფინალში იტალიელი ბენჯამინ ჰონისი დაამარცხა. ფინალში მას რთული გამოცდა ელის. ოქროს მოსაპოვებლად მაისურაძე მსოფლიოს 5-ზის ჩემპიონს და ორგზის ოლიმპიურ ჩემპიონ აბდულრაშიდ სადულაევს დაუპირისპირდება. „რუსული ტანკი“ ტურნირზე ნეიტრალური სპორტსმენის სტატუსით ასპარეზობს.