დიდი ტრანსფერი შედგა - პსჟ-მ ევროპის ერთ-ერთი ყველაზე მოთხოვნადი შემტევი იყიდა

„პარი სენ-ჟერმენმა“ და „აიაქსმა“ ბელგიელი მიკა გოდტსის ტრანსფერის თაობაზე შეთანხმებას მიაღწიეს, - ინფორმაციას ფაბრიციო რომანო ავრცელებს.

სატრანსფერო სიახლეების ექსპერტის თქმით, „აიაქსი“ პარიზული კლუბისგან ფეხბურთელის სანაცვლოდ 55 მილიონ ევროს მიიღებს.

ამ მომენტისთვის მხარეებს შორის დოკუმენტები გაცვლილი არ არის, თუმცა ვერბალურად ყველა დეტალი მოგვარებულია. გოდტსის ტრანსფერი, სავარაუდოდ, მალე ოფიციალურ სახეს მიიღებს.

21 წლის შემტევი „აიაქსს“ 2023 წელს შეუერთდა, ის „ანდერლეხტისა“ და „გენკის“ აკადემიის აღზრდილია. გასულ სეზონში ყველა ტურნირის ეგიდით მან 17 გოლი გაიტანა და 15 საგოლე გადაცემა შეასრულა.